ଅଷ୍ଟ୍ରେଲିଆ ୦୧ /୦୪ : ସ୍ଵରର ଯାଦୁରେ ସମସ୍ତଙ୍କ ମନକୁ ସହଜରେ ଜିତିଥାନ୍ତି ବଲିଉଡର ଚର୍ଚ୍ଚିତ ସିଙ୍ଗର ନେହା କକ୍କର । ବର୍ତ୍ତମାନ ଅଷ୍ଟ୍ରେଲିଆ କନସର୍ଟ ଶୋ’କୁ ନେଇ ପୁଣି ଚର୍ଚ୍ଚାର ବିଷୟ ପାଲଟିଛନ୍ତି । ୩ଘଣ୍ଟା ବିଳମ୍ବରେ ଷ୍ଟେଜରେ ପହଞ୍ଚିବାରୁ ଟ୍ରୋଲର ଶିକାର ହୋଇଛନ୍ତି ନେହା କକ୍କର । ନେହା ସମ୍ପୂର୍ଣ୍ଣ ଦୋଷ ଅର୍ଗାନାଇଜେସନ ଉପରେ ଆଣିଛନ୍ତି । କିନ୍ତୁ ନେହାଙ୍କ ମିଛ ତଥ୍ୟର ପର୍ଦ୍ଦାଫାଶ କରିଛନ୍ତି ପ୍ରଡକ୍ସନ ହାଉସ୍ । ଯାହା ପରେ ନେହାଙ୍କୁ ନେଇ ଫ୍ୟାନ୍ସଙ୍କ ମନରେ ତାଙ୍କ ପାଇଁ ଘୃଣାଭାବ ଦେଖିବାକୁ ମିଳିଛି ।
ନେହାଙ୍କ କନସର୍ଟକୁ ନେଇ ବର୍ତ୍ତମାନର ଚର୍ଚ୍ଚା ଜୋର ଧରିଛି । ନେହା କକ୍କରଙ୍କୁ ମାର୍ଚ୍ଚ ୨୩ ତାରିଖରେ ଅଷ୍ଟ୍ରେଲିଆ କନସର୍ଟ ଶୋ ପାଇଁ ନିମନ୍ତ୍ରଣ କରାଯାଇଥିଲା । ଆୟୋଜିତ କନସର୍ଟ ଶୋରେ ନେହା କକ୍କର ୩ଘଣ୍ଟାର ବିଳମ୍ବରେ ପହଞ୍ଚିଥିଲେ । ଯାହାକୁ ନେଇ ନେହାଙ୍କୁ ଟ୍ରୋଲ କରାଯାଇଥିଲା । ନିଜ ପକ୍ଷରେ ନେହା କହିଛନ୍ତି ତାଙ୍କୁ ଅର୍ଗାନାଇଜେସନ ଆଣିବାର ସୁବିଧା ଦେଇନଥିଲେ ଯେଉଁଥିପାଇଁ ସେ କନସର୍ଟରେ ବିଳମ୍ବରେ ପହଞ୍ଚିଥିଲେ । ଫଳରେ ଆୟୋଜକଙ୍କୁ ନେହା ଦୋଷୀ କରିଥିଲେ । ଯାହା ପରେ ଫ୍ୟାନ୍ସ ନେହାଙ୍କ କଥାକୁ ବିଶ୍ବାସ ମଧ୍ୟ କରିଥିଲେ ।
କିନ୍ତୁ ନେହା ଦେଇଥିବା ଦୋଷକୁ ଖଣ୍ଡନ କରିବାକୁ ଯାଇ ପ୍ରଡକ୍ସନ ହାଉସ ଫଟୋ ଭିଡିଓ ସୋସିଆଲ ମିଡିଆରେ ସେୟାର କରିଛନ୍ତି । ଯେଉଁ ଭିଡିଓରେ ନିଷେଧ ଥିବା ସ୍ଥାନରେ ନେହା କକ୍କର ସିଗାରେଟ ଟାଣୁଥିବାର ନଜରରେ ଆସିଛନ୍ତି । ଏହି ଘଟଣା ଗତ ସପ୍ତାହରୁ ଆରମ୍ଭ ହୋଇଛି ସତ କିନ୍ତୁ ଏ ଘଟଣାର ମୋଡ ଏଯାବତ୍ ବଦଳିନାହିଁ । ଏହି ଭାଇରଲ ଭିଡିଓକୁ ଦେଖି ନେହାଙ୍କ ଫ୍ୟାନ୍ସ ଉତ୍ତେଜିତ ହୋଇପଡିଛନ୍ତି । ଅନ୍ୟପଟେ ପ୍ରଡକ୍ସନ ହାଉସ୍ ଉପରେ ନେହା କରିଥିବା ଆରୋପର ପର୍ଦ୍ଦାଫାଶ କରିଛି ନିଜେ ପ୍ରଡକ୍ସନ ହାଉସ୍ ।
ନେହାଙ୍କ ଦାବିର ପ୍ରମାଣ ଦେବାକୁ ଯାଇ ସୋସିଆଲ ମିଡିଆରେ ନେହାଙ୍କ ହୋଟେଲ ବିଲ୍ ଏବଂ ଖାଦ୍ୟ ବିଲର ଫଟୋ ମଧ୍ୟ ସେୟାର କରିଛନ୍ତି । ଆଉ ଏକ ଭିଡିଓରେ ହୋଟେଲରୁ ବାହାରି ଫ୍ୟାନ୍ସଙ୍କ ସହ ଫଟୋ ଉଠାଇବା ପରେ ହୋଟେଲ ସାମ୍ନାରେ ଥିବା କାରରେ ବସିଥିଲେ । ଯାହାର ପ୍ରମାଣ ଦେଇଛି ପ୍ରଡକ୍ସନ ହାଉସ୍ । ଏହି ଭିଡିଓ ଫଟୋ ଭାଇରଲ ହେବା ପରେ ନେହା କକ୍କର ଫ୍ୟାନ୍ସଙ୍କ ଟାର୍ଗେଟକୁ ପୁଣିଥରେ ଆସିଛନ୍ତି ।