ଚମ୍ପୁଆ ବ୍ଲକରେ ୨୬୮ ହିତାଧିକାରୀଙ୍କୁ ଅନ୍ତ୍ୟୋଦୟ ଗୃହ କାର୍ଯ୍ୟାଦେଶ ବଣ୍ଟନ

ଆସିଲା ରାଜ୍ୟ ସରକାରଙ୍କ ଅନ୍ତ୍ୟୋଦୟ ପକ୍କା ଘର ଯୋଜନା । ଝାଟିମାଟିର ଘର ଛାଡି ଏବେ ପକ୍କା ଘରେ ରହିବେ ଲୋକେ । ରାଜ୍ୟ ସରକାରଙ୍କ ନିଜସ୍ୱ ପ୍ରଚେଷ୍ଟାରେ ଗରିବଙ୍କୁ ମିଳିବ ଘର । ଚମ୍ପୁଆ ବ୍ଲକ ପରିସରରେ ୨୬୮ ହିତାଧିକାରୀଙ୍କୁ ଅନ୍ତ୍ୟୋଦୟ ଗୃହ କାର୍ଯ୍ୟାଦେଶ ବଣ୍ଟନ କରାଯାଇଛି । ଏହି ଯୋଜନା ଭାରତ ସରକାରଙ୍କ ଗୃହ ଯୋଜନାର ଅଂଶ ଭାବରେ ଅନୁଷ୍ଠିତ ହୋଇଛି । ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କଳାହାଣ୍ଡିରୁ ଆଭାସୀ ମାଧ୍ୟମରେ ଏହି କାର୍ଯ୍ୟକ୍ରମର ଉଦ୍‌ଘାଟନ କରିଥିଲେ । ଏହି ଅବସରରେ ଓଡ଼ିଶାର ସମସ୍ତ ଜିଲ୍ଲା ଏବଂ ବ୍ଲକର ଗରିବ ଓ ବଞ୍ଚିତ ଲୋକମାନଙ୍କୁ ଗୃହ ପ୍ରଦାନ କରିବା ଯୋଜନା ନେଇ ବୃହତ୍ ଯୋଜନା ଘୋଷଣା କରାଯାଇଛି । ଚମ୍ପୁଆ ବ୍ଲକର ବିଭିନ୍ନ ଗ୍ରାମ ପଞ୍ଚାୟତର ମୋଟ ୨୬୮ ହିତାଧିକାରୀ ଏହି ଯୋଜନାର ଲାଭ ଉଠାଇପାରିବେ ।
ଏହି କାର୍ଯ୍ୟାନୁଷ୍ଠାନରେ ଉପସ୍ଥିତ ଥିଲେ ଚମ୍ପୁଆ ପଞ୍ଚାୟତ ସମିତିର ସଂସଦ ପ୍ରତିନିଧି ସିଦ୍ଧାର୍ଥ ସିଂ, ବିଧାୟକ ପ୍ରତିନିଧି ଗଣେଶ ଓର, ପାଟଣା ବିଧାୟକ ପ୍ରତିନିଧି ଭାବଗ୍ରାହୀ ମହାର, ପଞ୍ଚାୟତ ସମିତି ଅଧ୍ୟକ୍ଷ ସୁରେଶ ନାଏକ, ଚମ୍ପୁଆ ଗୋଷ୍ଠୀ ଉନ୍ନୟନ ଅଧିକାରୀ ସ୍ମୃତିରଞ୍ଜନ ସାହୁ, ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ଚୂନୁ ହାଁସଦା, ୧୫ନଂ ଜୋନ ଜିଲ୍ଲାପରିଷଦ ସଦସ୍ୟା ରମଣୀ ନାୟକ ଏବଂ ଅନ୍ୟମାନେ । ସ୍ଥାନୀୟ ଲୋକମାନେ ଏହି ଯୋଜନାକୁ ସ୍ୱାଗତ କରି ଏହାକୁ ଲୋକାଭିମୁଖୀ ଏବଂ ଉନ୍ନୟନମୂଖୀ ବୋଲି ବିବେଚନା କରିଛନ୍ତି । ଏହା ଗରିବ ଏବଂ ନିର୍ବଳ ଲୋକମାନଙ୍କ ପାଇଁ ଏକ ଉତ୍ତମ ପ୍ରୟାସ ବୋଲି ଅନେକ ଅଧିକାରୀ ମତ ପ୍ରକାଶ କରିଛନ୍ତି ।