ଆମେରିକା ୦୧/୪ : ଆମେରିକାରେ ବ୍ୟାପୁଛି ଏବିୟନ ଇନଫ୍ଲୁଏଞ୍ଜା ଭାଇରସ୍ । H5N1 ଭଳି ଏକ ପ୍ରକାର ପକ୍ଷୀଠାରୁ ବ୍ୟାପୁଥିବା ଜଣାପଡିଛି । ତେଣୁ ଏହି ଭାଇରସକୁ ବାର୍ଡ ଫ୍ଲୁ ମଧ୍ୟ କୁହାଯାଉଛି । ବର୍ତ୍ତମାନ ଭାଇରସ ବ୍ୟାପିବାକୁ ନେଇ ଆମେରିକାର ଚିନ୍ତାକୁ ବଢାଇଦେଇଛି । ସୂଚନାନୁଯାୟୀ ଏହି ଭାଇରସ ବିଶେଷ କରି ଗାଈ ଏବଂ ମଣିଷଙ୍କୁ ସଂକ୍ରମିତ କରୁଛି । ସଂକ୍ରମିତ ପକ୍ଷୀର ମଳ,ଲାଳ ବା ପର ସଂସ୍ପର୍ଶରେ ଆସିବା ଦ୍ବାରା H5N1 ଭାଇରସ ଦ୍ରୁତ ଗତିରେ ବଢିଥାଏ । ସଂକ୍ରିମିତ ପକ୍ଷୀର ମାଂସ ଖାଇବା ଫଳରେ ଏହି ଭାଇରସ ବ୍ୟାପିବାର ସମ୍ଭାବନା ଥାଏ ।
୪୦ରୁ ଅଧିକ ଦେଶର ଗ୍ଲୋବାଲ୍ ଭାଇରସ ନେଟୱାର୍କ ଏହି ମହାମାରୀ ସଂକ୍ରମଣର ବିରୋଧରେ ଏକ ପଦକ୍ଷେପ ନେବା ପାଇଁ ସରକାରଙ୍କୁ ଅନୁରୋଧ କରିଛନ୍ତି । ୯୯୫ରୁ ଉର୍ଦ୍ଧ୍ବ ଗାଈ ଏବଂ ୭୦ ଜଣ ଲୋକ ଏହି ଭାଇରସର ପ୍ରଭାବରେ ପ୍ରଭାବିତ ହୋଇଛନ୍ତି । ଯାହାଦ୍ବାରା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ୧୯୯୬ ମସିହାରେ ଚୀନ ପ୍ରଥମେ ହଂସଠାରେ ପରେ କୁକୁଡାଠାରେ ଏହି ଭାଇରସକୁ ଚିହ୍ନଟ କରିଥିଲା । ପରବର୍ତ୍ତୀ ସମୟରେ କୁକୁଡାଙ୍କ ପରେ ମଣିଷଙ୍କୁ ବ୍ୟାପିବା ଆରମ୍ଭ କରିଥିଲା ।
ଯଦିଓ ଏହି ଭାଇରସ ମଣିଷଙ୍କୁ ଶୀଘ୍ର ବ୍ୟାପିନଥାଏ ତଥାପି ମଣିଷଙ୍କ ମୃତ୍ୟୁ ସଂଖ୍ୟା ହାରରେ ବୃଦ୍ଧି ଆଣିଛି । ଅନ୍ୟପଟେ ଆମେରିକାରେ ଏହି ଭାଇରସ ଉପରେ କଡ଼ା ନଜର ରଖାଯାଇଛି । ଏହି ଭାଇରସ ସଂକ୍ରମିତ ବ୍ୟକ୍ତିଙ୍କୁ ପ୍ରବଳ ଜ୍ବର, କାଶ, ଗଳାରେ ଯନ୍ତ୍ରଣା, ନିଶ୍ବାସ ନେବାରେ କଷ୍ଟ ହେବା ଏବଂ ଶରୀର ବ୍ୟଥା ହେବା ଭଳି ଲକ୍ଷଣ ଦେଖାଦେଇଥାଏ । ଏହି ଭାଇରସର ଲକ୍ଷଣ ପ୍ରାୟତଃ ନିମୋନିଆ ଭଳି ଜଣାପଡିଥାଏ । ଏହି ରୋଗରୁ ରକ୍ଷା ପାଇବାକୁ ହେଲେ ସଂକ୍ରମିତ ପଶୁଙ୍କଠାରୁ ଦୂରେଇ ରହିବା ଆବଶ୍ୟକ ।
କୁକୁଡା ଚାଷ କରୁଥିବା ବ୍ୟକ୍ତି ସତର୍କତା ଅବଲମ୍ବନ କରି ମାସ୍କ ପିନ୍ଧି ଫାର୍ମରେ କାମ କରିବା ଉଚିତ୍ । ଯଦି କୌଣସି ସାମାନ୍ୟ ଲକ୍ଷଣ ଦେଖାଦେଉଛି ତେବେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରିବା ଉଚିତ୍ । ଏହା ବ୍ୟତୀତ ସରକାର ଏବଂ ସ୍ବାସ୍ଥ୍ୟ ଏଜେନ୍ସି ଜାରି କରିଥିବା ନିର୍ଦ୍ଦେଶାବଳୀକୁ ଅନୁକରଣ କରି ପାଳନ କରିବା ଜରୁରୀ ।