ପାକିସ୍ତାନ ୦୯/୫ : ଭାରତର ଆଟାକ୍ ପରେ ପାକିସ୍ତାନରେ ଆତଙ୍କ । ତେବେ ଯାହା ଶୁଣିବାକୁ ମିଳିଛି ଏପରି ସ୍ଥିତିରେ ପାକିସ୍ତାନ ସରକାର ସେନା ମୁଖ୍ୟଙ୍କୁ ହଟାଇ ଦେଇଛନ୍ତି । ଅର୍ଥାତ୍ ତାଙ୍କୁ ହେପାଜତକୁ ନିଆଯାଇଛି। ଅସୀମ ମୁନୀରଙ୍କ ଉପରେ ତାଙ୍କର ବ୍ୟକ୍ତିଗତ ଏଜେଣ୍ଡା ଅନୁସରଣ କରିବାର ଅଭିଯୋଗ ଆସିଛି।ସୟଦ ଅସୀମ ମୁନିର ଅହମ୍ମଦ ଶାହ ପାକିସ୍ତାନର ସେନାମୁଖ୍ୟ ଥିଲେ । ସେ ଭାରତ ବିରୋଧରେ ନିରନ୍ତର ବିଷ ଓଗାଳୁଥିଲେ । ୨୦୨୨ ମସିହାରୁ ସେ ପାକିସ୍ତାନ ସେନାର ୧୧ତମ ସେନା ମୁଖ୍ୟ ଭାବରେ କାର୍ଯ୍ୟ କରୁଥିଲେ। ସେନା ମୁଖ୍ୟ ହେବା ପୂର୍ବରୁ, ସେ GHQରେ କ୍ୱାର୍ଟରମାଷ୍ଟର ଜେନେରାଲ ଭାବରେ ନିଯୁକ୍ତ ଥିଲେ।
ପାକିସ୍ତାନରେ, ସେନା ମୁଖ୍ୟଙ୍କୁ ସାଧାରଣତଃ ୩ ବର୍ଷ ପାଇଁ ନିଯୁକ୍ତ କରାଯାଏ। ଏହି ଅନୁସାରେ, ଅସୀମ ମୁନିରଙ୍କ କାର୍ଯ୍ୟକାଳ ନଭେମ୍ବରରେ ଶେଷ ହେବାକୁ ଯାଉଥିଲା କିନ୍ତୁ ଆଇନ ପରିବର୍ତ୍ତନ କରି ଏହାକୁ ୩ ବର୍ଷରୁ ୫ ବର୍ଷକୁ ବୃଦ୍ଧି କରାଯାଇଥିଲା । ଏହା ପରେ, ଅସୀମ ମୁନିରଙ୍କ କାର୍ଯ୍ୟକାଳ ନଭେମ୍ବର ୨୦୨୭ ପର୍ଯ୍ୟନ୍ତ ଥିଲା କିନ୍ତୁ ଖବର ଅନୁସାରେ, ତାଙ୍କୁ ଏବେ ହେପାଜତକୁ ନିଆଯାଇଛି। ପାକିସ୍ତାନକୁ ଏବେ ଜଣେ ନୂତନ ସେନା ମୁଖ୍ୟ ମିଳିପାରେ।ଅପରେସନ ସିନ୍ଦୁର ପରେ, ପାକିସ୍ତାନୀ ସେନା ଉପରେ ପ୍ରଶ୍ନ ଉଠାଯାଉଛି। ତେହେରିକ୍-ଏ-ତାଲିବାନ୍ ପାକିସ୍ତାନ ସେନା ଉପରେ ଆତଙ୍କବାଦୀ ଆଡ୍ଡା ସହ ଜଡିତ ଗୁରୁତ୍ୱପୂର୍ଣ୍ଣ ସୂଚନା ଭାରତକୁ ଲିକ୍ କରୁଥିବା ଅଭିଯୋଗ କରିଛି। ଏହା ପରେ, ଭାରତ ଅପରେସନ ସିନ୍ଦୂର ଆରମ୍ଭ କରିଥିଲା । ପାକିସ୍ତାନ ଓ ପିଓକେର ୯ ଟି ସ୍ଥାନରେ ଆକ୍ରମଣ କରିଥିଲା । ଏଥିରେ ଅତି କମରେ ୧୦୦ ଆତଙ୍କବାଦୀ ନିହତ ହୋଇଥିବା କୁହାଯାଉଛି।
ଏହି ଆକ୍ରମଣରେ ଲସ୍କର-ଏ-ତୈବା, ଜୈଶ-ଏ-ମହମ୍ମଦ ଏବଂ ହିଜବୁଲ ମୁଜାହିଦ୍ଦିନର ଘାଟି ଉପରେ ମଧ୍ୟ କ୍ଷେପଣାସ୍ତ୍ର ଆକ୍ରମଣ କରାଯାଇଥିଲା। ଆତଙ୍କବାଦୀ ଆଡ୍ଡା ଉପରେ ଭାରତୀୟ ସେନାର ସଠିକ୍ ଆକ୍ରମଣ ସମଗ୍ର ପାକିସ୍ତାନରେ ହଇଚଇ ସୃଷ୍ଟି କରିଥିଲା। ଏହା ପରେ, ଟିଟିପି ସେନା ଉପରେ ପ୍ରଶ୍ନ ଉଠାଇଥିଲା । ଏବେ ସେନା ମୁଖ୍ୟଙ୍କୁ ହଟାଇ ହେପାଜତକୁ ନିଆଯାଇଥିବା ଖବର ଶୁଣିବାକୁ ମିଳିଛି ।