ସ୍ୱତନ୍ତ୍ର ଟ୍ରେନ୍ ଯୋଗେ ଦିଲ୍ଲୀରେ ପହଞ୍ଚିଲେ ଆଇପିଏଲ ଖେଳାଳି । ପଞ୍ଜାବ କିଙ୍ଗସ ମାଲିକାଣୀ ପ୍ରିତୀ ଜିଣ୍ଟା ମଧ୍ୟ ସମାନ ଟ୍ରେନରେ ଘରେ ପହଞ୍ଚିଛନ୍ତି ।ଗତକାଲି ଧର୍ମଶାଳାରେ ପଞ୍ଜାବ କିଙ୍ଗାସ ଓ ଦିଲ୍ଲୀ କ୍ୟାପିଟାଲ୍ସର ମଧ୍ୟରେ ୫୮ତମ ମ୍ୟାଚ୍ ଖେଳାଯାଉଥିଲା । ୧୦.୧ ଓଭରରେ ପଞ୍ଜାବ ଗୋଟିଏ ଓ୍ବିକେଟ୍ ହରାଇ ୧୨୨ ରନ୍ ସଂଗ୍ରହ କରିଥିଲା । ହେଲେ ବୈଷୟିକ ତ୍ରୁଟି ଯୋଗୁଁ ମ୍ୟାଚକୁ ଅଧାରୁ ବାତିଲ୍ କରାଯାଇଥିଲା ।
ଖେଳାଳି ମାନଙ୍କୁ ଦିଲ୍ଲୀ ଆଣିବା ପାଇଁ ଜମ୍ମୁ ଓ ଚଣ୍ଡିଗଡ଼କୁ ବିମାନ ସେବା ବନ୍ଦ ଥିବାରୁ ସ୍ୱତନ୍ତ୍ର ଟ୍ରେନର ବ୍ୟବସ୍ଥା କରାଯାଇଥିଲା । ତେବେ ଆଜି ସଂଧ୍ୟାରେ ସମସ୍ତ ଖେଳାଳି ରାଜଧାନୀ ଦିଲ୍ଲୀରେ ପହଞ୍ଚିଛନ୍ତି ।
ଖେଳାଳି ଓ ଅନ୍ୟ ଷ୍ଟାପଙ୍କ ପାଇଁ ଦୁଇ ସ୍ୱତନ୍ତ୍ର କୋଚଙ୍କ ବ୍ୟବସ୍ଥା କରାଯାଇଥିଲା । ସମସ୍ତ ଖେଳାଳି ସେମାନଙ୍କ ପରିବାର ସହିତ ଏବଂ ଆଇପିଏଲ ସହିତ ଜଡ଼ିତ ଅଧିକାରୀ ଓ ପଞ୍ଜାବ କିଙ୍ଗସର ମାଲିକାଣୀ ପ୍ରୀତି ଜିଣ୍ଟା ମଧ୍ୟ ବିଶେଷ ଟ୍ରେନରେ ଦିଲ୍ଲୀର ସଫଦରଗଞ୍ଜ ରେଳ ଷ୍ଟେସନରେ ରାତି ୯ଟାରେ ପହଞ୍ଚିଛନ୍ତି ।
ପଞ୍ଜାବ କିଙ୍ଗସର ଅଧିନାୟକ ଶ୍ରେୟସ ଆୟର, ୟୁଜବନ୍ଦ୍ର ଚହଲ, ମାର୍କୋ ୟାନସନ, ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଅକ୍ଷର ପଟେଲ, କେଏଲ ରାହୁଲ, ଫାଫ୍ ଡୁ ପ୍ଲେସିସ୍ ଆଜି ବଡ଼ ବଡ଼ ଖେଳାଳି ମାନେ ଦିଲ୍ଲୀର ବିଭିନ୍ନ ହୋଟେଲରେ ପହଞ୍ଚିଛନ୍ତି ।
ଉତ୍ତର ରେଳ ବିଭାଗ ସିପିଆରଓ ହିମାଂଶୁ ଶେଖର ଉପାଧ୍ୟାୟ କହିଛନ୍ତି, ଜମ୍ମୁ ଓ ଚଣ୍ଡିଗଡ଼ ଏୟାରପୋର୍ଟ ବନ୍ଦ ଥିବାରୁ ଅନେକ ଯାତ୍ରୀ ଫସି ରହିଛନ୍ତି । ଏପରି ସ୍ଥିତିରେ ରେଳ ମନ୍ତ୍ରୀ ଅଶ୍ଵିନୀ ବୈଷ୍ଣବଙ୍କ ନିର୍ଦ୍ଦେଶ କ୍ରମେ ଜମ୍ମୁ, ଉତ୍ତମପୁର ଓ କଟରାରୁ ଦିଲ୍ଲୀ ଓ ନୂଆଦିଲ୍ଲୀକୁ ପାଞ୍ଚ ସ୍ୱତନ୍ତ୍ର ଟ୍ରେନ୍ ଚଳାଚଳ କରୁଛି ।