ନୂଆଦିଲ୍ଲୀ ୧୨/୦୪ : ଏପ୍ରିଲ୍ ୨ରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ସମେତ ଦୁନିଆର ଅନେକ ଦେଶ ଉପରେ ଯେସାକୁ ତେସା ଟାରିଫ୍ ଲାଗୁ କରିଥିଲେ । ଏହାପରେ ସାରା ଦୁନିଆର ବାଣିଜ୍ୟିକ ଯୁଦ୍ଧର ଆଶଂକା ବଢିଥିଲା । ବିଶ୍ୱ ବଜାରରେ ହାହାକାର ସୃଷ୍ଟି ହୋଇଥିଲା । ଏହାରି ଭିତରେ ଆମେରିକୀୟ ଡଲାର ମଧ୍ୟ ବେଶ ଦୁର୍ବଳ ହୋଇଛି । ଏହି ଅବଧିରେ ଭାରତରେ ବିଦେଶୀ ନିବେଶକଙ୍କ ଇନଫ୍ଲୋ ମଧ୍ୟ ବଢିଛି । ଏହି କାରଣରୁ ଏପ୍ରିଲ୍ ୪ରେ ଶେଷ ହୋଇଥିବା ସପ୍ତାହରେ ଦେଶର ବିଦେଶୀ ମୁଦ୍ରା ଭଣ୍ଡାର ୧୦ ବିଲିୟନ୍ ଡଲାର ବଢିଛି । ଏହାସହ ଦେଶର ଫରେକ୍ସ ରିଜର୍ଭ ପାଞ୍ଚ ମାସର ସର୍ବୋଚ୍ଚ ସ୍ତର ୬୭୬.୨୬୮ ବିଲିୟନ ଡଲାରରେ ପହଞ୍ଚିଛି ।
ଭାରତୀୟ ରିଜର୍ଭ ବ୍ୟାଙ୍କ ଦ୍ୱାରା ଶୁକ୍ରବାର ଜାରି ଡାଟା ଅନୁସାରେ ଭାରତର ବିଦେଶୀ ମୁଦ୍ରା ଭଣ୍ଡାର ୧୦.୮୭୨ ବିଲିୟନ ଡଲାର ବଢିଛି । ଗତ ସପ୍ତାହରେ ଡଲାର ତୁଳନାରେ ଭାରତୀୟ ମୁଦ୍ରା ମଜଭୁତ ହୋଇଛି । ଏହା ପୂର୍ବରୁ ମାର୍ଚ୍ଚ ୨୬ରେ ୬.୫୯ ବିଲିୟନ ଡଲାର ବୃଦ୍ଧି ହୋଇଥିଲା । ଉଲ୍ଲେଖଯୋଗ୍ୟ ଯେ ୨୦୨୪ ଡିସେମ୍ୱର ୨୭ରେ ଶେଷ ହୋଇଥିବା ସପ୍ତାହରେ ଦେଶର ବିଦେଶୀ ମୁଦ୍ରା ଭଣ୍ଡାର ନିଜର ସର୍ବକାଳୀନ ଉଚ୍ଚ ସ୍ତର ୭୦୪.୮୮୫ ବିଲିୟନ ଡଲାରରେ ପହଞ୍ଚିଛି ।
ରିଜର୍ଭ ବ୍ୟାଙ୍କ ପକ୍ଷରୁ ଜାରି ସାପ୍ତାହିକ ଡାଟା ଅନୁସାରେ ଆଲୋଚ୍ୟ ସପ୍ତାହରେ ଦେଶର ବିଦେଶୀ ମୁଦ୍ରା ସମ୍ପତ୍ତିରେ ଅଧିକ ଅଭିବୃଦ୍ଧି ଘଟିଛି । ୨୦୨୫ ଏପ୍ରିଲ ୪ରେ ଶେଷ ସପ୍ତାହରେ ଫରେନ୍ କରେନ୍ସି ଆସେଟ୍ ୯.୦୭୪ ବିଲିୟନ ଡଲାର ବଢିଛି । ଉଲ୍ଲେଖଯୋଗ୍ୟ ଯେ ଦେଶର ମୋଟ ବିଦେଶୀ ମୁଦ୍ରା ଭଣ୍ଡାରରେ ଫରେନ୍ କରେନ୍ସି ଆସେଟ୍ ସବୁଠୁ ଗୁରୁତ୍ୱପୂର୍ଣ୍ଣ ଅଂଶ ହୋଇଥାଏ ।
ଗତ ସପ୍ତାହରେ ଦେଶର ସ୍ୱର୍ଣ୍ଣ ଭଣ୍ଡାରରେ ମଧ୍ୟ ବୃଦ୍ଧି ଦେଖିବାକୁ ମିଳିଥିଲା । ରିଜର୍ଭ ବ୍ୟାଙ୍କ ଅନୁସାରେ ୨୦୨୫ ଏପ୍ରିଲ୍ ୪ରେ ଶେଷ ହୋଇଥିବା ସପ୍ତାହରେ ଗୋଲ୍ଡ ରିଜର୍ଭରେ ୧.୫୬୭ ବିଲିୟନ ଡଲାର ବଢିଛି । ଏହାସହ ଦେଶର ସୁନା ଭଣ୍ଡାର ଏବେ ବଢି ୭୯.୩୬୦ ବିଲିୟନ ଡଲାର ହୋଇଛି । ସେହି ଆଲୋଚ୍ୟ ସପ୍ତାହରେ ଏସଡିଆର ୧୮୬ ମିଲିୟନ ଡଲାର ବଢିଛି । ଅନ୍ତରାଷ୍ଟ୍ରୀୟ ମୁଦ୍ରା ପାଣ୍ଠିରେ ଦେଶର ରିଜର୍ଭ ୪୬ ମିଲିୟନ ଡଲାର ବଢି ୪.୪୫୯ ବିଲିୟନ ଡଲାର ହୋଇଛି ।
