ନୂଆଦିଲ୍ଲୀ: ୟୁ-ଟ୍ୟୁବର ରଣବୀର ଆହ୍ଲାବାଦିଆଙ୍କୁ ଆଶ୍ୱସ୍ତି । ରଣବୀର ଆହ୍ଲାବାଦିଆଙ୍କୁ ନିଜ ସୋ’ରେ ଶାଳିନତା ରକ୍ଷା କରିବା ସର୍ତ୍ତରେ ‘ଦି ରଣବୀର ସୋ’ର ପ୍ରସାରଣ ପୁଣି ଆରମ୍ଭ କରିବାକୁ ଅନୁମତି ଦେଇଛନ୍ତି ସୁପ୍ରିମକୋର୍ଟ । ମାତା-ପିତାଙ୍କୁ ନେଇ ଅଭଦ୍ର ଟିପ୍ପଣୀ କରିଥିବା ରଣବୀରଙ୍କୁ ସୁପ୍ରିମକୋର୍ଟ ଗୋଟିଏ ସର୍ତ୍ତରେ ସୋ’ ଆରମ୍ଭ କରିବାକୁ ଅନୁମତି ଦେଇଛନ୍ତି। ଏହା ସହିତ ସୁପ୍ରିମକୋର୍ଟ ପରବର୍ତ୍ତି ଆଦେଶ ପର୍ଯ୍ୟନ୍ତ ରଣବୀରଙ୍କ ଗିରଫ ଉପରେ ସଂରକ୍ଷଣ ବଢାଇ ଦେଇଥିବା ବେଳେ ତାଙ୍କୁ ଗୌହାଟୀରେ ଯାଞ୍ଚରେ ସାମିଲ ହେବାକୁ ନିର୍ଦ୍ଦେଶ ଦେଇଛନ୍ତି।
ଉଲ୍ଲେଖଯୋଗ୍ୟ ଯେ ‘ଇଣ୍ଡିଆଜ ଗଟ ଲାଟେଣ୍ଟ’ ମାମଲାରେ ଚାଲିଥିବା ମକଦ୍ଦମାରେ ୟୁ-ଟ୍ୟୁବର ଓ ପଡକାଷ୍ଟର ରଣବୀର ଆହ୍ଲାବାଦିଆ ସୁପ୍ରିମକୋର୍ଟରେ ଏକ ଆବେଦନ କରିଥିଲେ। ଏଥିରେ ରଣବୀର କୋର୍ଟଙ୍କ ଆଦେଶର ଗୋଟିଏ ଅଂଶକୁ ହଟାଇବାକୁ ନିବେଦନ କରିଥିଲେ, ଯେଉଁଥିରେ ତାଙ୍କୁ ତାଙ୍କର ସୋ’ ପ୍ରସାରଣ କରିବାକୁ ରୋକା ଯାଇଥିଲା। ତେବେ ରଣବୀରଙ୍କ ଓକିଲ ତାଙ୍କର ୨୮୦ ଜଣ କର୍ମଚାରୀ ଥିବା ଓ ଏହା ସେମାନଙ୍କ ଜୀବିକା ବୋଲି କହିଥିଲେ।
ଗୁଆହାଟୀରେ ତାଙ୍କ ବିରୋଧରେ ମାମଲା ଆସିଥିବା ବେଳେ ତଦନ୍ତରେ ସହଯୋଗ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ଉଚ୍ଚ ଅଦାଲତଙ୍କ କଟକଣା ମଧ୍ୟରେ ତାଙ୍କୁ ସୋସିଆଲ ମିଡ଼ିଆରେ ଏୟାର ଶୋ’ କରିବା ନେଇ ଅନୁମତି ମିଳୁ ବୋଲି ସୁପ୍ରିମକୋର୍ଟଙ୍କୁ ଆହ୍ଲାବାଦିଆା ଅନୁରୋଧ କରିଥିଲେ । ଏହା ତାଙ୍କର ଏକମାତ୍ର ଜୀବିକା ବୋଲି ରଣବୀର ଉଲ୍ଲେଖ କରିଥିଲେ । ତେବେ ଏହି ମାମଲାରେ ରଣବୀର ’ନିରବ ରହିବା’ ଉଚିତ ବୋଲି ସଲିସିଟର ଜେନେରାଲ ତୁଷାର ମେହତା ଯୁକ୍ତି କରିଥିଲେ । ରଣବୀରଙ୍କୁ କିଛି ସମୟ ପାଇଁ ନିରବରେ ରହିବାକୁ ଦିଆଯାଉ ବୋଲି ଶ୍ରୀ ମେହଟା ଉଚ୍ଚ ଅଦାଲତରେ କହିଥିଲେ । ରଣବୀରଙ୍କ ଲୋକପ୍ରିୟ ପଡକାଷ୍ଟ ଶୋ ପ୍ରତ୍ୟେଗ ବର୍ଗର ଲୋକଙ୍କ ପାଇଁ ଗ୍ରହଣୀୟ ବୋଲି ରଣବୀରଙ୍କୁ ଆଶ୍ବସ୍ତି ଦେବା ଅବସରରେ ସୁପ୍ରିମକୋର୍ଟ କହିଛନ୍ତି ।
