ଦୁବାଇ: କିଏ ହାତେଇବ ଚାମ୍ପିଅନ୍ସ ଟ୍ରଫି । ଭାରତ ନା ନ୍ୟୁଜିଲାଣ୍ଡ । ଆଜି ଫାଇନାଲ ମୁକାବିଲାରେ ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ସୁପର ସଣ୍ଡେରେ ଉଭୟଙ୍କ ମଧ୍ୟରେ ହେବ ସୁପର ଫାଇଟ । ଦୁଇ ସନ୍ତୁଳିତ ଓ ଦୃଢ଼ ମାନସିକ ଦକ୍ଷତାଧାରୀ ଦଳ ପରସ୍ପରକୁ କଡ଼ା ଟକ୍କର ଦେଇ ଟ୍ରଫି ଜିତିବାକୁ ଜୋରଦାର୍ ଲଢ଼େଇ କରିବେ । ୨୫ ବର୍ଷ ପରେ କିୱି ଠାରୁ ବଦଲା ଲକ୍ଷ୍ୟରେ ରୋହିତ ବ୍ରିଗେଡ୍ । କିୱିକୁ ଚେକ୍ ଦେବାକୁ ଭାରତର ମହା ରଣନୀତି । ଫାଇନାଲରେ ନ୍ୟୁଜିଲାଣ୍ଡକୁ ହରାଇବାକୁ ହେଲେ ରୋହିତ ବାହିନୀକୁ ୩ଜଣ ଖେଳାଳିଙ୍କ ପ୍ରତି ସତର୍କ ରହିବାକୁ ପଡ଼ିବ । ଏହି ୩ ଖେଳାଳି ହେଲେ ମିଚେଲ ସାଣ୍ଟନର, ରଚିନ ରବିନ୍ଦ୍ର ଓ କେନ ୱିଲିୟମସନ । ଚାମ୍ପିଅନସ ଟ୍ରଫିରେ ମଧ୍ୟ ତାଙ୍କର ପ୍ରଦର୍ଶନ ଭଲ ରହିଛି । ୱିଲିୟମସନଙ୍କ ଦକ୍ଷତା ସହ ଭାରତ ଭଲ ଭାବେ ପରିଚିତ । ରଚିନ ରବିନ୍ଦ୍ର ଏବେ ଶ୍ରେଷ୍ଠ ଫର୍ମରେ ଅଛନ୍ତି । ୨୨୬ ରନ ସହ ଦୁଇଟି ଶତକ ହାସଲ କରିଛନ୍ତି ।
ତେବେ ଫାଇନାଲ ମୁକାବିଲାରେ ନ୍ୟୁଜିଲାଣ୍ଡର ପ୍ରମୁଖ ପେସ ବୋଲର ମାଟ ହେନରୀ ଖେଳିବା ନେଇ ଆଶଙ୍କା ରହିଛି । ଏପଟେ ଫାଇନାଲ୍ ଫାଇଟରେ ଟିମ୍ ଇଣ୍ଡିଆର ବଳ ବିରାଟ, ବରୁଣ ଓ ଗିଲ୍ । ଲିଗ୍ ଓ ନକଆଉଟ୍ ପର୍ଯ୍ୟାୟରେ ସମସ୍ତ ଟିମକୁ ମାତ୍ ଦେଇ ଅପରାଜେୟ ରହିଛି ରୋହିତ୍ ସେନା । ବ୍ୟାଟିଂ, ବୋଲିଂ ଓ ଫିଲ୍ଡିଂରେ ଭାରତୀୟ ଦଳର ଜବରଦସ୍ତ ପ୍ରଦର୍ଶନ ରହିଛି ।
