ଭୁବନେଶ୍ବର: ରାଜଧାନୀ ଭୁବନେଶ୍ୱରରୁ ଗିରଫ ହେଲେ ୬ ଏଟିଏମ ଲୁଟେରା । ଭୁବନେଶ୍ଵର ଏୟାରଫିଲଡ ଅଞ୍ଚଳରୁ ଏହି ଲୁଟେରା ମାନଙ୍କୁ ଗିରଫ କରିଛି କମିସନରେଟ ପୋଲିସର ସ୍ପେଶାଲ ସ୍କ୍ୱାର୍ଡ । ଲିଙ୍ଗରାଜ ଅଞ୍ଚଳର ଶ୍ରୀରାମନଗରରେ ଥିବା ଏସବିଆଇ ଏଟିଏମ୍ ଲୁଟ ଘଟଣାର କମିସନରେଟ ପୋଲିସ ପର୍ଦ୍ଦାଫାସ କରିଛି। ପୋଲିସ ୬ ଜଣଙ୍କୁ ଗିରଫ କରିଛି। ଏମାନଙ୍କ ନିକଟରୁ ଏକ ଲକ୍ଷ ୭୦ ହଜାର ଟଙ୍କା ପୋଲିସ ଜବତ୍ କରିଛି । ଏହି ଘଟଣାରେ ଜଡିତ ଅନ୍ୟ ୨ ଜଣ ପଶ୍ଚିମବଙ୍ଗ ଲୁଟେରା ଫେରାର ରହିଛନ୍ତି। ଗିରଫ ଅଭିଯୁକ୍ତମାନେ ହେଉଛନ୍ତି ବିକି ଓରଫ ଦେବୀ ପ୍ରସାଦ ମଲିଆ , କ୍କାଂହା ଓରଫ ରମାକାନ୍ତ ସାହୁ , ସାଗର ସାମଲ , ବରୁ ଓରଫ ବୀରେନ ରାଉତ , ଆକାଶ ମହାପାତ୍ର ଏବଂ ଆକାଶ ମୁଖାର୍ଜୀ ।
ସୂଚନାଯୋଗ୍ୟ, ଏହି ଲୁଟେରା ମାନେ ଜାନୁଆରୀ ୨୪ରେ ଲିଙ୍ଗରାଜ ଥାନା ଅଞ୍ଚଳରେ ଏକ ଏସବିଆଇ ଏଟିଏମକୁ ଲୁଟ୍ କରିଥିଲେ । ପ୍ରାୟ ୨୦ ଲକ୍ଷ ଟଙ୍କା ଲୁଟ୍ କରିବା ସହ ଏଟିଏମକୁ ନେଇ ଦୟାନଦୀରେ ଫିଙ୍ଗି ଦେଇଥିଲେ । ତେବେ ଯାହା ସୂଚନା ମିଳିଛି କି, ଏଟିଏମ୍ ଲୁଟ୍ କରି ସେହି ଟଙ୍କାରେ ଘର ବନାଇଥିଲେ ଲୁଟେରା । ଏପଟେ ଏହି ଘଟଣାରେ ସମ୍ପୃକ୍ତ ଦୁଇ ଅନ୍ତଃରାଜ୍ୟ ଅପରାଧୀ ରାଜୁ ଓ ରୁସ୍ତମ୍ ଏବେବି ଫେରାର ଅଛନ୍ତି ।
ଗିରଫ ୬ଜଣଙ୍କ ମଧ୍ୟରୁ ଦୁଇ ଜଣଙ୍କର ଅପରାଧିକ ରେକର୍ଡ ରହିଛି । ଏହି ଦୁଇ ଜଣ ଝାରପଡା ଜେଲରେ ଥିବା ସମୟରେ ହିଁ ଏଟିଏମ୍ ଲୁଟ୍ ର ପ୍ଲାନିଂ କରିଥିଲେ । ଯେଉଁଥିରେ ଏମାନେ ଅନ୍ୟ ୪ଜଣଙ୍କ ସହିତ କିଛି ଅନ୍ତଃରାଜ୍ୟ ଅପରାଧୀଙ୍କୁ ମଧ୍ୟ ସାମିଲ୍ କରିଥିଲେ । ଏହି ଗ୍ୟାଙ୍ଗ ସାରା ଦେଶରେ ସକ୍ରିୟ ଥିବା ଜଣାପଡ଼ିଛି । ୨୦୨୨ରେ ଏମାନେ ଧଉଳି ଥାନା ଅଞ୍ଚଳରେ ଏକ ଏଟିଏମ ଲୁଟରେ ସଂପୃକ୍ତ ଥିବା ମଧ୍ୟ ପୋଲିସ ସୂଚନା ଦେଇଛି ।
