ପୁରୀ ୧୨/୦୪: ଆଜିଠୁ ପୁରୀରେ ବିଜେପିର ଦୁଇ ଦିନିଆ ପ୍ରଶିକ୍ଷଣ ଶିବିର । ବିଜେପି ବିଧାୟକ ଓ ସାଂସଦଙ୍କୁ ଗୁରୁମନ୍ତ୍ର ଦେବେ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ଗତକାଲି ସେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ଭାବେ ରାଜ୍ୟରେ ଆୟୁଷ୍ମାନ ଯୋଜନାର ଶୁଭାରମ୍ଭ କରିଥିଲେ । ଆଜି ବିଜେପି ଅଧ୍ୟକ୍ଷ ଭାବେ ପ୍ରଶିକ୍ଷଣ ଶିବିରକୁ ସମ୍ବୋଧିତ କରିବେ । ପୁରୀ କୋଣାର୍କ ରୋଡ ସ୍ଥିତ ସ୍ୱାମୀ ନାରାୟଣ ମନ୍ଦିର ପରିସରରେ ବିଜେପିର ଦୁଇ ଦିନିଆ ପ୍ରଶିକ୍ଷଣ ଶିବିର ଅନୁଷ୍ଠିତ ହେଉଛି । ଏଥିରେ ୩ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ବିନୀ ବୈଷ୍ଣବ ଓ ଜୁଏଲ ଓରାମ ଯୋଗ ଦେବେ । ମୁଖ୍ୟମନ୍ତ୍ରୀ ମୋହନ ମାଝୀ ଓ ଦୁଇ ଉପମୁଖ୍ୟମନ୍ତ୍ରୀ ଯୋଗ ଦେବେ । ସମସ୍ତ ମନ୍ତ୍ରୀ, ବିଧାୟକ ଓ ସାଂସଙ୍କୁ ପ୍ରଶିକ୍ଷଣ ଶିବିରକୁ ଡକାଯାଇଛି। ବିଜେପିର ରାଷ୍ଟ୍ରୀୟ ସାଧାରଣ ସଂପାଦକ ବିଏଲ ସନ୍ତୋଷ ମଧ୍ୟ ବୈଠକରେ ଯୋଗ ଦେବା ସୂଚନା ରହିଛି ।
ଆଜି ରାଜ୍ୟର ବିଜେପି ସରକାରକୁ ୧୦ ମାସ ପୂରୁଛି । ଗତ ଜୁନ ୧୨ ତାରିଖରେ ବିଜେପି ସରକାର ଶପଥ ନେଇଥିଲା । ସରକାରକୁ ୧୦ ମାସ ପୂରୁଥିବା ବେଳେ ତାଲିମ ଶିବରର ବେଶ ଗୁରୁତ୍ବ ରହୁଛି । ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ଉପଲବ୍ଧି କିପରି ଲୋକଙ୍କ ପାଖରେ ପହଞ୍ଚିବ, ରାଜ୍ୟରେ ସରକାର ଓ ସଂଗଠନ ମଧ୍ୟରେ କିଭଳି ଉତ୍ତମ ସମନ୍ବୟ ରହିବ, ସାଂସଦ ଓ ବିଧାୟକମାନଙ୍କ ମଧ୍ୟରେ କିଭଳି ଭଲ ବୁଝାମଣା ରହିବ, ସେ ସବୁ ପ୍ରସଙ୍ଗରେ ଗୁରୁମନ୍ତ୍ର ଦେଇପାରନ୍ତି ନଡ୍ଡା । ଏହାସହ ରାଜ୍ୟରେ ନୂଆ ସଭାପତି କିଏ ହେବେ, ସେ ନେଇ ନେତୃବୃନ୍ଦଙ୍କ ମଧ୍ୟରେ ସହମତି ଆଣିବା ଦିଗରେ କଥାବାର୍ତ୍ତା କରି ପାରନ୍ତି ନଡ୍ଡା । ଏଥିସହ ଆଗକୁ ରାଜ୍ୟ ମନ୍ତ୍ରିମଣ୍ଡଳର ସଂପ୍ରସାରଣ ମଧ୍ୟ ରହିଛି । ଗତକାଲି ରାତିରେ ବିଜେପି କୋର କମିଟି ବୈଠକ ବସିଥିଲା । ଏସବୁ ଦୃଷ୍ଟିରୁ ଏହି ତାଲିମ ଶିବିର ଅତ୍ୟନ୍ତ ଗୁରୁତ୍ବ ରଖୁଛି।
