ଗୁଜରାଟ ୨୩/୪ : ଗୁଜରାଟ ଅମରୋଲିର ଗିରିୟା ରୋଡ ସ୍ଥିତ ଜନବସତି ଅଞ୍ଚଳରେ ଏକ ଟ୍ରେନିଂ ବିମାନ ଦୁର୍ଘଟଣାଗ୍ରସ୍ତ । ଏହି ଦୁର୍ଘଟଣାରେ ବିମାନରେ ଥିବା ପାଇଲଟଙ୍କ ମୃତ୍ୟୁ ହୋଇଛି । ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଚିତ୍କାର ଶୁଣାଯାଇଥିଲା ।ଖବର ମୁତାବକ, ଅପରାହ୍ନ ୧୨.୫୨ ସମୟରେ ବିମାନ ଦୁର୍ଘଟଣା ଖବର ମିଳିଥିଲା । ଖବର ପାଇବା ପରେ ଅଗ୍ନିଶମ ଟିମ୍ ତୁରନ୍ତ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ବିମାନରେ ଥିବା ପାଇଲଟକୁ ଉଦ୍ଧାର କରାଯାଇ ହସପିଟାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ତାଙ୍କର ମୃତ୍ୟୁ ହୋଇଥିଲା ।
ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ବିମାନଟି ଜନବସତି ଉପରେ ପଡିଥିଲା । ଶାସ୍ତ୍ରୀ ନଗର ଅଞ୍ଚଳରେ ପ୍ଲେନର ଭଗ୍ନାବଶେଷ ପଡ଼ିଥିବା ପରେ ସଙ୍ଗେ ସଙ୍ଗେ ନିଆଁ ଲାଗିଯାଇଥିଲା । ସ୍ଥାନୀୟ ଅଞ୍ଚଳର ୪ଟି ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ମୃତ ପାଇଲଟ ଜଣକ ଘରୋଇ ପାଇଲଟ ଟ୍ରେନିଂ ସଂସ୍ଥାର ହୋଇଥିବା ଜଣାପଡ଼ିଛି ।ଗତ କିଛିଦିନ ତଳେ ମେହସାଣାରେ ଏୟାରଫୋର୍ସର ଏକ ଜାଗୁଆର ଫାଇଟର ବିମାନ କ୍ରାସ ହୋଇଯାଇଥିଲା । ଏହି ବିମାନଟି ଜାମନଗର ଏୟାରଫୋର୍ସ ଷ୍ଟେସନରୁ ଉଡ଼ାଣ ଭରିଥିଲା । ଏହି ଘଟଣାରେ ଜଣେ ପାଇଲଟଙ୍କ ଜୀବନ ଚାଲିଯାଇଥିବା ବେଳେ ଜଣେ ଗୁରୁତର ହୋଇଥିଲେ ।